ទំព័រទឹកភ្នែក មនុស្សកម្សត់
Not allow reviews
អត្ថបទ
ផ្លូវជីវិតមួយនេះហាក់ខ្វាត់ខ្វែង គោលដៅមួយនោះនៅឆ្ងាយសែនវែង
ដំណើរលាយឡំដោយក្តីចំបែង ដែនដីល្វឹងល្វើយដេកដើរម្នាក់ឯង។
ជំហានឯកាគ្មានអ្នកប្រឡែង រស់នៅគ្មានអ្វីជាប់ជាសំញែង
គិតៗទៅប្រៀបជាឆាកកំប្លែង សាច់រឿងល្អគ្មានអ្នករួមសម្តែង
អារម្មណ៍ស្នេហាតែគ្មានតំណែង ស្រឡាញ់ចង់វាចាប្រាប់ថ្លាថ្លែង
ចង់កៀកក្បែរស្ងួនថ្នាក់ថ្នមតាក់តែង តែនៅតែញញើតខ្លបខ្លាចក្រែង
ទទួលសម្តីស្រែកតបក្តែងៗ មុខជាស្រក់ឈាមមុតជាងលំពែង
ចិត្តបេតីអាចដាច់ខ្សែដូចខ្លែង តែលតោលខ្សោះខ្សត់គ្មានអ្វីស្ញប់ស្ញែង
រឹតតែមិនមានអ្វីមកខែងរ៉ែង ចិត្តស្ម័គ្រស្មោះត្រូវគេកៀចបង្វែង
ចិញ្ចាចពណ៌មាសមិនស្មើទង់ដែង រឿងសញ្ចេតនានៅមានអ្នកប្រជែង
ចាប់ចូលសមរភូមិនៃភាពទាស់ទែង ប្រយុទ្ធដណ្តើមខ្លាំងក្លាស្វះស្វែង
បេះដូងបងនឹមនួនចោលគ្រវែង បុណ្យបាបក៏មិនញញើតរអែង
ស្រទេញស្រវាបន្តខ្នះខ្នែង ពិបាកទ្រាំរៀនរស់ដោយប្រឹងប្រែង
ពេលហត់សម្រាកទ្រឹងមួយកន្លែង សង្ខារសែនស្រអាប់មិនចាំងចែង
ឱកាសដូចកម្តៅក្តៅសូរសែង ភាពសោកសៅក្រាលក្រាស់ដូចកំផែង
ផ្អោបភ្ជាប់ជំនន់ទឹកភ្នែកត្រាំត្រែង ខួរក្បាលចងចាំរឿងចាស់មិនលែង
គ្រួសារការងាររៀនស្នេហាបែង ចែកជាមុំបួនចតុកោណកែង
គិតគូរទាមទារគ្រប់គ្រងហួងហែង រិះរកពេកពិតមិនមែនក្លាយក្លែង
ខ្វាយខ្វល់រហ័សសម្បើមឆ្វាត់ឆ្វែង ទ្រោមក្រពះពោះវៀនសួតលំពែង
ដល់ថ្នាក់បេះដូងក៏យ៉ាប់ណោងណែង ទីស្នេហាថ្មីរំពៃចាចែង
បមបីប្រលោមប្រណីជ្រោមជ្រែង យ៉ាងណាយ៉ាងណីនិស្ស័យជាក់ស្តែង
********
ប្រើពេលសរសេរជាង៣ម៉ោង ចាប់ពីម៉ោង២រសៀល រហូតដល់ម៉ោងនេះ នៅទីកន្លែងស្ងាត់មួយ។ ខ្ញុំសម្ងំសរសេរសំណេរនេះម្នាក់ឯង សម្លឹងភ្នែកជាមួយវ៉ែនតាស្ទើរបែកផ្សែង។ ខាងលើនេះត្រឹមជាសំណេរចួន និងរណ្តំពាក្យប៉ុណ្ណោះ មិនត្រឹមត្រូវ ទៅតាមក្បួនច្បាប់បទកាព្យទេ។ តែខ្ញុំប្រឹងនឹករកពាក្យចុងចួន រណ្តំឃ្លោងឃ្លា មួយឃ្លាមាន៨ព្យាង្គ ឃ្លានីមួយៗគឺ ព្យាង្គទី៨ ចួននឹងព្យាង្គទី៨។ នៅចុងឃ្លាទាំងអស់ គឺចួននឹងសំឡេង «ែ+ង»។ សំណេរនេះខ្ញុំនឹង បញ្ចូលទៅក្នុងសាច់រឿង «ទំព័រទឹកភ្នែក»។ ដែលគិតមកដល់ពេលនេះ កើនបាន២ទំព័រ មិនដឹងថ្ងៃណាគ្រប់ទំព័រទេ ចេះតែប្រឹងសន្សំទំព័របណ្តើរៗ សន្សំទំព័រនាពេលដែលអារម្មណ៍អណ្តែតអណ្តូងខ្លាំង
កវីសន្សើមត្រជាក់
Add a review